તે ઑર વાત છે.

ચોપડામાં લાખ હો તે ઑર વાત છે,

રોકડા જે હાથ હો તે ઑર વાત છે.

આબરૂને નામ ઉધારી ઘણી કરી,

રૂદિયે ઉચાટ હો તે ઑર વાત છે.

સામસામે બંદુકો તાકી ઉભા હતા,

સરહદે જોડાણ હો તે ઑર વાત છે.

કેટલાં ખાનાં બનાવી જિંદગી જીવ્યા,

રેણ હો સંધાણ હો તે ઑર વાત છે.

મેં કહી ને તેં કહી તે વાત એક છે,

તો ય અફવા ચાર હો તે ઑર વાત છે.

કેટલા તૉડ્યા કિનારા ક્યાંક ખુદ ઝુક્યા,

જિંદગી પ્રવાહ હો તે ઑર વાત છે.

એક તક આવી કહે ચાલો સુખી કરું,

આખરી પ્રસ્તાવ હો તે ઑર વાત છે.

રાહમાં ચાલ્યા જતાં સામે જુએ બધા,

‘કીર્તિ’ સાથોસાથ હો તે ઑર વાત છે.
-કીર્તિકાન્ત પુરોહિત