સાચી ચોક્કસ સોળ આની હોત તો…!
મેં તમારી વાત માની હોત તો…!
મિત્રતાનું મૂલ્ય સમજાશે પછી,
એક દુશ્મન કોઈ જાની હોત તો…!
ઓરડે વાત્સલ્ય મ્હેકી ઊઠતે,
ભીંત પર તસવીર બાની હોત તો…!
આમ સૌને જાણ થઈ ગઈ છે જુઓ,
લાગણી હૈયે જો છાની હોત તો…!
માગવાનો ભીખ પણ ક્યાં પ્રશ્ન છે ?
ખૂબ મોટો હું જ દાની હોત તો…!
ક્યાં ગઝલ કહેવાની પરવા હો મને ?
આ સફર ક્ષણની સુહાની હોત તો…!
નક્કી તમને ઓળખી શકતે ‘ દિલીપ ‘
જો ન ચહેરા પર બુકાની હોત તો…!
-ડૉ દિલીપ મોદી
